Mariing kinondena ng Police Regional Office 11 ang mga akusasyon ng iilang grupo tungkol sa pamumulitika umano ng Pambansang Pulisya kaugnay sa pagpapatupad nito ng Warrants of Arrest kay Apollo Quiboloy.
Ayon kay Police Brigadier General Nicholas Torre III, Regional Director PRO 11, legal na proseso lamang ang kanilang ginagawa at walang kinalaman sa pulitika. Dagdag pa niya na itigil na ang kanilang walang basehang akusasyon at igalang ang legal na proseso.
“Ang pagpu-politicize ng batas ay nagbabanta sa tiwala ng publiko at sa rule of law. Ang aming pangako sa katarungan at transparency ay matatag. Inaanyayahan namin ang publiko na labanan ang politically motivated misinformation at suportahan ang patas na aplikasyon ng katarungan,” saad ni PBGen Torre.
Binigyang linaw din ng PNP na walang pagsasara ng kalsada ang naganap sa CP Garcia Highway. Ang mga hakbang na isinagawa sa paligid ng KOJC compound para sa pag-aresto kay Pastor Quiboloy at iba pang indibidwal ay isinagawa sa koordinasyon sa lokal na awtoridad at alinsunod sa mga legal na kinakailangan.
Samantala hinikayat naman ng PNP ang publiko na maging mapanuri at kumuha lamang ng impormasyon mula sa maaasahan at na-verify na mga mapagkukunan upang maiwasan ang maling impormasyon at hindi pagkakaunawaan.
