Kasabay ng traditional Flag Raising Ceremony ay nag-iwan ng mensahe si Police Brigadier General Nicolas D Torre III, Regional Director ng Police Regional Office 11, para sa lahat ng pulis na nakatalaga sa paghahain ng Warrant of Arrest laban kay Pastor Apollo Quiboloy sa KOJC Compound, Buhangin, Davao City nito lamang Lunes, Setyembre 2, 2024.
Sinimulan nito ang kanyang mensahe sa pagpupunto na nasa kaalaman niya na hindi lamang ang mga pulis ang naaapektuhan sa nasabing operasyon, kundi pati na rin ang mga pamilya nito at gayundin ang kanyang pamilya.
Kaugnay nito, ipinahayag rin ni General Torre na sa kabila ng mga propaganda ng SMNI, ang mga ito ay hamon lamang at malalagpasan katuwang ang suporta ng nakararami nating mga kababayan.
“Hindi tayo ang pulis na kinatatakutan ng mga tao. Tayo ang pulis na pinaniniwalaan ng mga tao. Narito tayo para protektahan ang lahat, siguraduhin na patas ang batas, at ipakita na walang nakahihigit sa batas,” giit ni PBGen Torre.
Binigyang-diin din niya na tanggap niya ang responsibilidad sa operasyon at sa lahat ng kapulisan na nasasangkot sa operasyon kung kaya naman raw ay manatiling magpakatatag at humugot ng lakas sa kaalaman na mahalaga ang kanilang mga ginagawa sapagkat “nasa panig tayo ng batas”, pahayag ni RD Torre.
