Nasabat sa ikinasang Search Warrant ng Taguig City Police Station ang tinatayang Php102,000 halaga ng shabu sa isang lalaking suspek nito lamang Miyerkules, Agosto 28, 2024.
Kinilala ni Police Brigadier General Leon Victor Z Rosete, District Director ng Southern Police District, ang nadakip na suspek na si alyas “Bungal”, 40 taong gulang.
Inihain ang Search Warrant No. 2024-060 ng Ususan Police Sub-Station 4 sa suspek dakong 3:30 ng hapon sa Barangay Bambang, Taguig City.
Hinalughog ng mga awtoridad ang lugar kung saan nadiskubre ang siyam na heat-sealed transparent plastic sachets na naglalaman ng hinihinalang shabu, na humigit-kumulang 15 gramo ang bigat na tinatayang nasa Php102,000 at mga drug paraphernalia.
Nahaharap ang suspek sa mga reklamo para sa paglabag sa Section 11 at 12 Article II ng Republic Act 9165.
Hindi hihinto ang SPD sa pagsugpo at pagdakip sa mga sindikato ng ilegal na droga sa kanilang mga nasasakupang lugar upang maprotektahan ang mga inosenteng indibidwal para sa ikauunlad ng bansang Pilipinas.
Source: SPD PIO
Panulat ni PSSg Remelin M Gargantos
