Nasabat sa isang High Value Individual ang nasa Php666,604 ng ilegal na droga sa isinagawang drug bust ng City Drug Enforcement Team ng Lipa City Police Station sa Barangay 3, Lipa City, Batangas, dakong 8:05 ng gabi noong Agosto 28, 2024.
Kinilala ni PLtCol Rix S Villareal, hepe ng Lipa City Component Police Station, ang naarestong suspek na si alyas “Jepong,” 38 taong gulang, nakalista bilang High Value Individual sa Lipa CPS Drug Watchlist at residente ng Barangay 3, Lungsod ng Lipa, Batangas.
Nakumpiska ng mga awtoridad ang 14 transparent plastic sachet na naglalaman ng hinihinalang shabu, na may timbang na 98.03 gramo, at may Standard Drug price na Php666,604, android phone, pouch, at drug bust money.
Ayon naman kay PBGen Paul Kenneth T Lucas, Regional Director ng PRO 4A, “Ito ay patunay ng ating mas pinaigting na kampanya laban sa ilegal na droga. Sa tulong na din ng ating mga kababayan na buo ang loob at patuloy na nagtitiwala sa atin, nakakakuha tayo ng mga mahahalagang impormasyon para mabilis natin mahuli ang mga kriminal na ito.”
Dagdag pa rito, hinikayat ni PBGen Lucas ang publiko na patuloy na suportahan ang mga programa ng pamahalaan at Pambansang Pulisya. “Sa ating mga kababayan patuloy niyo po kaming suportahan at sama-sama nating isulong ang Bagong Pilipinas na ligtas at walang droga.”
Source: Batangas PNP-PIO
Panulat ni Pat Maria Sarah P Bernales
