Arestado ang isang lolo matapos maihain ang Warrant of Arrest sa kasong paglabag sa Republic Act 10591 o “Comprehensive Firearms and Ammunition Regulation Act” sa Blk 19, Barangay Rosary Heights 8, Cotabato City noong ika-17 ng Agosto 2024.
Kinilala ni Police Colonel Joel S Estaris, City Director ng Cotabato City Police Office, ang suspek na si alyas “Kasan”, 62 anyos na residente ng naturang lugar.
Ayon kay PCol Estaris, bandang 1:30 ng tanghali nang maaresto ang suspek ng mga tauhan ng Cotabato City Police Office, City Investigation Unit Operatives, Police Station 2, CMFC, City Drug Enforcement Unit, at 1404th RMFB 14-A sa bisa ng Warrant of Arrest sa kasong paglabag sa RA 10591.
Nakuha rin mula sa operasyon ang isang unit Caliber .45 na may serial number 700178; dalawang magasin; 27 piraso ng Caliber .45 na bala; isang improvised shotgun na walang serial number; apat na piraso ng 12 gauge shotgun ammunition; isang steel cleaning brush; isang spring; isang inside holster; isang tactical belt; dalawang M2O3 40mm ammo; at sampung M14 7.62mm ammo.
Kasong paglabag sa Section 28 ng Republic Act 10591 at Section 1 ng RA 9516 o penalty of Reclusion perpetua kaugnay ng PD 1866 ang inihahanda laban sa suspek.
Ang matagumpay na pagkakaaresto sa suspek ay patunay lamang sa epektibong pagpapatupad ng Cotabato City PNP sa sinumpaang tungkulin na maghatid ng serbisyo publiko para sa mas maayos, maunlad, at mapayapang Bagong Pilipinas.
Panulat ni Patrolwoman Judy Ann Alibo
