Arestado ang Top 6 Regional High Value Individual at nasamsam ang tinatayang Php142, 800 halaga ng shabu sa ikinasang operasyon ng mga otoridad nito lamang ika-8 ng Agosto 2024 sa Bilawan 1, National Highway, Barangay Central, Mati City, Davao Oriental.
Kinilala ni Police Major Al Anthony I Gumban, Officer-In-Charge ng Mati City Police Station, ang suspek na si alyas “Kulaling”, 37 anyos, isang mekaniko at residente ng Bilawan 3, National Highway, Barangay Central, Mati City.
Ang suspek ay naaresto sa isinagawang buy-bust operation ng pinagsanib na puwersa ng intel operatives ng nasabing istasyon, RIU 11, NISG-EM, NISU-72 at PDEA na nagresulta sa pagrekober mula sa suspek ng humigit kumulang 21 gramo ng shabu na may Standard Drug Price na Php142,800 at mahaharap sa kasong paglabag sa Republic Act 9165 o Comprehensive Dangerous Drugs Act of 2002.
Samantala, ang laban kontra kriminalidad ay patuloy na pinapaigting ng Police Regional Office 11 sa pamumuno ni Regional Director Police Brigadier General Nicolas D Torre III alinsunod sa kampanya ng Bagong Pilipinas na panatilihin ang kapayapaan at kaayusan tungo sa pagsulong ng bansa.
Panulat ni Patrolwoman Shairra Rose A Aquino
