Timbog ang suspek sa pamamaril at narekober ang granada at baril sa harap ng Five Vibes Bar sa Purok Lower Acharon, Barangay Calumpang, General Santos City dakong 4:15 ng madaling araw nito lamang Agosto 3, 2024.
Ayon sa imbestigasyon ng PNP, nagkaroon ng pagtatalo ang biktima na kinilalang si alyas “Rex”, 23 anyos, isang Security Guard mula Davao Occidental at ang suspek na si alyas “Dodong”, residente naman ng Barangay Fatime, General Santos City.
Nabatid na bigla umanong bumunot si Dodong ng isang Cal.38 na baril at pinaputukan ang kasagutang gwardiya ngunit nagawang makaiwas ng biktima.
Agad namang rumesponde ang PNP at napilitang gumanti ang mga awtoridad dahil sa walang habas na pagpapaputok ng suspek.
Nagtamo ang suspek ng daplis ng bala sa kanyang paa at agad isinugod sa General Santos City Medical Center at nasa maayos nang kalagayan.
Narekober mula sa suspek ang .38 revolver na baril, granada, anim na bala, isang keypad Cellphone, isang lighter, gunting, shades, at pera.
Patuloy ang PNP sa pagsiguro ng kaligtasan ng publiko tungo sa isang maunlad at progresibong Bagong Pilipinas.
Panulat ni Patrolwoman Khnerwin Jay Medelin
