Sa muling pagbubukas ng klase sa darating na Lunes, Hulyo 29, 2024, mas lalong paiigtingin ng PNP Bicol sa pangunguna ni Police Brigadier General Andre P Dizon, Regional Director ng Police Regional Office 5, ang Police Visibility upang masiguro ang kaligtasan at katahimikan sa lahat ng eskwelahan sa buong rehiyong Bicol.
Ang mga kapulisan ay itatalaga sa mga pangunahing daan, paradahan, at loob ng mga paaralan upang magbigay ng seguridad sa mga mag-aaral, guro, at mga magulang.
Layunin ng hakbangin na ito na mabawasan ang anumang maaaring insidente ng krimen at masiguro ang maayos na daloy ng trapiko sa mga paaralan.
Bukod sa pagpapalakas ng presensya ng kapulisan, ang PNP Bicol ay magkakaroon ng karagdagang Police Assistance Desks malapit sa mga eskwelahan upang agad na makaresponde sa anumang emergency at mas mabilis na matugunan ang mga pangangailangan ng komunidad.
Magkakaroon din ng koordinasyon sa iba’t ibang ahensya ng gobyerno upang tiyakin ang kaligtasan at kalusugan ng mga mag-aaral sa pagbabalik nila sa paaralan. Kasama dito ang pagsasagawa ng information campaigns ukol sa kaligtasan sa kalsada, crime prevention, at disaster preparedness.
Magpapatuloy rin ang motorcycle at bike patrols na pangungunahan ni PBGen Dizon upang personal na makita ang kalagayan sa kalsada at eskwelahan.
Ang paghahandang ito ay patunay ng kagustuhan ng PNP Bicol na hindi lamang panatilihin ang seguridad sa rehiyon kundi tiyakin din ang magandang kinabukasan para sa mga kabataan.
Source: PNP Kasurog Bicol
