Tinatayang nasa mahigit Php1,400,000 halaga ng Fully Grown Marijuana Plants ang nadiskubre ng mga operatiba sa isinagawang marijuana eradication sa Barangay Loccong, Tinglayan, Kalinga nito lamang ika-13 ng Hulyo 2024.
Ayon kay Police Colonel Gilbert A Fati-ig, Provincial Director ng Kalinga Police Provincial Office, naging matagumpay ang operasyon sa pagsisikap ng pinagsanib na pwersa ng mga operatiba sa pangunguna ng 1st Kalinga Provincial Mobile Force Company, Provincial Drug Enforcement Unit, Kalinga Police Provincial Office, katuwang ang Tinglayan Municipal Police Station, Philippine Drug Enforcement Agency Kalinga.
Ang operasyon ay nagresulta sa pagkadiskubre ng dalawang plantasyon ng marijuana na may kabuuang sukat na 700 square meters na may nakatanim na humigit kumulang 7,000 piraso ng Fully Grown Marijuana Plants na nagkakahalaga ng Php1,400,000 Standard Drug Price.
Bagamat walang nahuling cultivator, lahat ng mga binunot na Fully Grown Marijuana Plant ay sinunog sa mismong lugar.
Pinuri naman ni PCol Fati-ig ang mga operatiba sa kanilang matagumpay na operasyon at sinisiguro naman na lalong paiigtingin ang kanilang kampanya kontra sa ilegal na droga upang matuldukan ang paglaganap ng pinagbabawal na gamot sa kanilang nasasakupan bilang pagsuporta sa isinusulong ng Pangulo na Whole-of-Nation Approach na kinakailangan para masugpo ang paglaganap ng ilegal na droga at maging illegal drug-free ang bansang Pilipinas.
