Narekober ng pulisya ang mga nakatagong armas at pampasabog ng mga komunistang teroristang grupo sa tulong ng isang dating miyembro ng Communist Terrorist Group (CTG) sa Barangay Masi, Rizal, Cagayan noong ika-3 ng Hulyo 2024.
Ang matagumpay na operasyon ay pinamunuan ni Police Lieutenant Colonel Rexon B Casaway, Force Commander ng 1st Cagayan Provincial Mobile Force Company katuwang ang mga tauhan ng Rizal Police Station kasama ang iba pang miyembro ng Cagayan PNP.
Nahukay at narekober ng mga awtoridad ang mga sumusunod na armas at pampasabog na kinabibilangan ng dalawang piraso ng Grenade Riffle; isang piraso ng improvise hand Grenade; isang piraso ng improvised Cartridge ng caliber 60mm; 20 piraso ng blasting caps; apat na piraso ng Handheld Radio; Cord Detonating; assorted medical supplies, at iba pang hindi na gumaganang gamit pandigma.
Ang mga narekober na kagamitan na pampasabog ay nasa kustodiya ng Cagayan Provincial EOD and Canine Unit habang nasa kustodiya ng Rizal Police Station naman ang ibang narekober na gamit.
Patuloy ang Cagayan PNP sa paghihikayat na magbalik-loob sa gobyerno ang mga tagasuporta at miyembro ng mga makakaliwang grupo, at lisanin na ang ipinaglalaban na maling ideolohiya, upang makamtan ang payapa, ligtas, at nagkakaisang Bagong Pilipinas.
Source: Cagayan PPO
Panulat ni Patrolman Erwin Calaus
