Nadiskubre ng mga operatiba ang tinatayang Php3 milyong halaga ng Fully Grown Marijuana Plants sa isinagawang marijuana eradication sa Barangay Loccong, Tinglayan, Kalinga nito lamang ika-29 ng Hunyo 2024.
Ayon kay Police Colonel Gilbert A Fati-ig, Provincial Director ng Kalinga Police Provincial Office, naging matagumpay ang operasyon sa pinagsanib na pwersa sa pangunguna ng Tinglayan Municipal Police Station katuwang ang Regional Intelligence Division, Kalinga Provincial Drug Enforcement Unit/Provincial Intelligence Unit, 1st at 2nd Kalinga Provincial Mobile Force Company at Philippine Drug Enforcement Agency-Kalinga.
Ang operasyon ay nagresulta sa pagkadiskubre ng isang plantasyon ng marijuana sa isang communal forest na may kabuuang lawak na 1,000 square meters na may nakatanim na humigit kumulang 15,000 na piraso ng Fully Grown Marijuana Plants na nagkakahalaga ng Php3,000,000 Standard Drug Price.
Bagamat walang nahuling cultivator, lahat ng nadiskubreng Fully Grown Marijuana Plants ay sinunog sa mismong lugar.
Pinuri naman ni PCol Fati-ig ang mga operatiba sa kanilang matagumpay na operasyon at sinisiguro naman na lalo pa nilang paiigtingin ang kanilang kampanya kontra sa ilegal na droga sa kanilang nasasakupan bilang pagsuporta sa hangarin ng kasalukuyang administrasyon na matuldukan ang ipinagbabawal na gamot sa ating bansa tungo sa mas mapayapang Bagong Pilipinas.
Panulat ni PSSg Juderick S Tasing
