Tinatayang Php2,400,000 halaga ng tuyong tangkay ng marijuana ang sinunog ng mga awtoridad sa isinagawang marijuana eradication sa Sitio Sakaang, Madaymen, Kibungan, Benguet nito lamang Hunyo 17, 2024.
Ayon kay Police Colonel Joseph P Bayongasan, Provincial Director ng Benguet Police Provincial Office, naging matagumpay ang operasyon sa pinagsanib na pwersa ng mga tauhan ng Kibungan Municipal Police Station, Benguet Police Provincial Office, Regional Intelligence Division at Philippine Drug Enforcement Agency-CAR.
Ang operasyon ay nagresulta sa pagkadiskubre ng higit kumulang 20,000 gramo ng pinatuyong dahon at tangkay ng marijuana na may Standard Drug Price na nagkakahalaga ng Php2,400,000.
Bagamat, walang nahuling marijuana cultivator, kaagad namang sinunog ng mga operatiba ang mga nadiskubreng ipinagbabawal na halaman.
Ang matagumpay na operasyon ng Benguet PNP ay isa lamang sa mga resulta ng walang tigil at mas pinaigting na kampanya kontra sa ilegal na droga upang mapanatili ang kaayusan at katahimikan sa kanilang nasasakupan tungo sa isang Bagong Pilipinas.
