Mahigit Php4 milyong halaga ng shabu ang nasabat sa isinagawang drug buy-bust operation ng Balasan Municipal Police Station sa Purok 4 Barangay Lawis Balasan, Iloilo nito lang ika-11 ng Hunyo 2024.
Kinilala ni Police Captain Renzo Martinez, hepe ng Balasan MPS, ang naarestong suspek na si alyas “Ronnel”, 28 anyos, walang asawa, isang High Value Individual, tagapag-alaga ng palaisdaan at residente ng Barangay Lawis, Balasan, Iloilo.
Isinagawa ang operasyon ng mga tauhan ng Balasan MPS-Station Drug Enforcement Team kasama ang Iloilo Police Provincial Office-Special Operation Unit at Carles SBC.
Narekober sa suspek ang ilegal na droga na tumitimbang ng humigit kumulang na 704.2 gramo na may Standard Drug Price na Php4,788,560, Php50,000 buy-bust money, at isang pirasong break type na baril na may isang bala.
Ang naarestong suspek ay nasa pangangalaga na ng pulisya at sasampahan ng kasong paglabag sa Republic Act 9165 o Comprehensive Dangerous Drugs Act of 2002, at RA 10591 o ang Comprehensive Firearms and Ammunition Regulation Act.
Hindi tumitigil ang Iloilo PNP sa kampanya upang masugpo ng ilegal na droga sa kanilang nasasakupan upang mapanatili ang katahimikan sa buong rehiyon.
Source: Iloilo PPO
Panulat ni Pat Valencia
