Arestado ng mga awtoridad ang Top 4 Regional Most Wanted Person na may kasong paglabag sa RA 9165 sa Barangay 12, Dolores, Eastern Samar nito lamang ika-03 ng Hunyo 2024.
Kinilala ni Police Colonel Jose Manuel C Payos, Provincial Director ng Eastern Samar Police Provincial Office ang suspek na si alyas “Onel”, 30 taong gulang, at residente ng Barangay 2, Dolores, Eastern Samar.
Bandang 10:40 ng gabi ng ikasa ang operasyon ng mga tauhan ng Eastern Samar Police Provincial Office kasama ang Dolores Municipal Drug Enforcement Unit, 1st Eastern Samar Provincial Mobile Force Company at 801st Maneuver Company, Regional Mobile Force Battalion 8 sa koordinasyon sa Philippine Drug Enforcement Agency 8.
Nakuha sa suspek ang anim na pakete ng hinihinalang shabu na may tinatayang timbang na 6.08 gramo na nagkakahalaga ng Php41,344.00, isang 500 peso bill, at 7 pirasong 1,000-peso bill na bogus money.
Mahaharap ang suspek sa kasong paglabag sa Section 5 at 11 ng Article 2 ng RA 9165 o Comprehensive Dangerous Drugs Act of 2002.
Ang Pambansang Pulisya ay patuloy sa kampanya laban sa ilegal na droga at iba pang krimen upang mapanatili ang maayos at ligtas na komunidad tungo sa Bagong Pilipinas.
Panulat ni Patrolwoman Marielle Dulnuan
