Malaking halaga ng shabu ang nasabat ng Bulacan PNP, at arestado ang limang suspek matapos ang ikinasang buy-bust operation sa Barangay Ana Maria Subdivision, Barangay IBA, Meycauayan City, Bulacan nito lamang Linggo, ika-19 ng Mayo 2024.
Ayon sa ulat ng Bulacan PNP, ang mga naarestong suspek ay kinilalang sina alyas “Jr”, 43 anyos; alyas “Kalbo” 39 taong gulang; alyas “Reyes”, 44 taong gulang; alyas “Ichi”, 20 taong gulang at alyas “Dora’, 40 taong gulang.
Naging matagumpay ang operasyon ng pinagsanib na pwersa ng mga tauhan ng Station Drug Enforcement Unit at Philippine Drug Enforcement Agency Bulacan sa nasabing operasyon.
Nasabat sa mga suspek ang hinihinalang shabu na may timbang na humigit kumulang 200.5 gramo at may Standard Drug Price na Php1.3 milyon.
Nahaharap ang mga suspek sa kasong paglabag sa Republic Act 9165 o Comprehensive Dangerous Drugs Act of 2002 amended by RA 10640.
Ang Bulacan PNP ay walang tigil sa pagsasawata at pagpapaigting ng kampanya laban sa mga gumagamit at nagbebenta ng ilegal na droga para masiguro ang kaayusan sa kanilang nasasakupan.
Panulat ni Pat Maria Ella Garcia
