Matagumpay na naaresto ang Canadian National na sangkot umano sa nasabat na isang toneladang shabu na nagkakahalaga ng humigit kumulang Php9.7B na nangyari sa Alitagtag, Batangas noong ika -15 ng Abril 2024.
Ayon sa NCRPO, na siyang nagkasa ng manhunt operation, nadakip si Thomas Gordon alyas “James Martin” sa Pag-ibig Unit, Nurture Spa and Wellness, Barangay Maitim II, Tagaytay City dakong 9:00 ng gabi nito lamang Huwebes, Mayo 16, 2024.
Nakuha sa kanyang pagmamay-ari ang iba’t ibang IDs, bank cards, cellphones at mga ilegal na droga na hindi pa isinasapubliko ang halaga.
Siya umano ay nakatakas sa isinagawang raid noon sa isang bahay sa Nasugbu, Batangas.
Naglabas na ng red notice para sa kanyang interpol at isinailalim na rin ang suspek sa inquest proceedings sa Department of Justice.
Kakaharapin nito ang kasong paglabag sa Section 11, Article II ng Republic Act 9165 o ang Comprehensive Dangerous Drugs Act of 2002.
Ang PNP katuwang ang iba pang mga ahensya ng gobyerno ay patuloy sa kampanya laban sa ilegal na droga, upang mapanatiling maayos at ligtas ang ating komunidad tungo sa Bagong Pilipinas.
