Nasabat ang humigit-kumulang na Php340,000 na halaga ng shabu mula sa tatlong High Value Individuals sa operasyon ng Bacoor PNP at Philippine Drug Enforcement Agency (PDEA) sa Barangay Talaba 3, Bacoor City, Cavite nito lanang Abril 6, 2024.
Kinilala ni Police Lieutenant Colonel John Paolo V Carracedo, hepe ng Bacoor Component City Police Station, ang mga suspek na sina alyas “Kuya”, 38, residente ng Barangay Zapote 1, Bacoor City, Cavite, alyas “Ron”, 46, at alyas “Lyca”, 26, parehong residente ng Taguig City.
Naaresto ang mga suspek matapos mahuli sa aktong nagbebenta ng shabu sa isang pulis na umaktong poseur buyer.
Narekober mula sa kanila ang humigit-kumulang limampung (50) gramo ng hinihinalang shabu, kasama ang iba’t ibang kagamitan tulad ng Php500 na buy-bust money, pouch, android cellphone, at isang Honda PCX motorcycle.
Mahaharap ang mga suspek sa kasong paglabag sa Republic Act 9165 o Comprehensive Dangerous Drugs Act of 2002.
Ang mas pinaigting at mas pinahusay na operasyon ay nagpapakita ng pagkakaisa ng mga ahensya ng pamahalaan sa pagsugpo ng ilegal na droga, alinsunod sa pangunahing prayoridad ng administrasyon na labanan ang mga ilegal na aktibidad para sa kapakanan ng mamamayan at kaligtasan ng komunidad tungo sa Bagong Pilipinas.
Source: Bacoor Component City Police Station Panulat ni Patrolwoman Pricelle May T Urbano
