Sa kulungan ang bagsak ng isang ama matapos niyang barilin ang kanyang anak sa Lower Laguerta, Lahug, Cebu City, nito lamang Lunes, Marso 25, 2024.
Kinilala ni Police Colonel Ireneo B Dalogdog, City Director ng Cebu City Police Office, ang suspek na si Eugenio, 63 taong gulang, residente ng nasabing lugar.
Ayon sa imbestigasyon, binaril ng suspek ang kanyang anak na kinilalang si Kenn, 28 taong gulang, matapos siyang hampasin nito ng kahoy sa leeg dahil sa kanilang pagtatalo.
Nagtamo ng sugat sa ulo ang biktima na naging dahilan ng kanyang pagkamatay.
Agad namang rumesponde ang mga tauhan ng Police Station 4, Cebu City Police Office at nagsagawa ng hot pursuit operation, ngunit boluntaryong sumuko ang suspek sa Mabolo Police Station.
Nahaharap ang suspek sa kasong paglabag sa Article 246 ng Revised Penal Code o Parricide.
Sinisiguro naman ng Cebu City PNP na kanilang mas pag-iigihin ang lahat ng kanilang hakbangin upang tugisin ang bawat personalidad na may paglabag sa batas.
Panulat ni Pat Carla Jane Tanio
Source: CCPO
