Nakumpiska ng pulisya ang isang homemade .38 revolver mula sa isang indibidwal sa Purok Sambag, Barangay Tisa, Cebu City nito lamang Linggo, Marso 17, 2024.
Kinilala ni Police Major Eraño Sanchez Regidor, Station Commander ng Police Station 10, Cebu City Police Office, ang suspek na si “Jonas”, 38 taong gulang, residente ng Purok Sambag, Barangay Tisa, Cebu City.
Ayon kay PMaj Regidor, sila ay nakatanggap ng tawag mula sa isang concerned citizen na may isang armadong lalaki sa kanilang lugar.
Agad namang rumesponde ang mga tauhan ng Police Station 10 kasama ang SWAT Team ng CCPO sa nasabing lugar na nauwi sa pagkakaaresto ng suspek dahil wala itong maipakitang mga kinakailangang dokumento.
Nakuha mula sa suspek ang isang homemade 38 revolver, isang bala, at isang basyo ng bala ng nasabing baril.
Ang suspek ay nahaharap ngayon sa kasong paglabag sa Republic Act 10591 o Illegal Possession of Firearms and Ammunition Regulation Act.
Ang Cebu City PNP ay buo ang pangako na pag-igihan ang kanilang tungkulin para mapanatili ang katahimikan at kaligtasan ng komunidad tungo sa Bagong Pilipinas.
Source: Spot Report from CCPO
Panulat ni Pat Carla Jane Tanio
