Sinibak sa pwesto ang tatlong pulis matapos silang masangkot sa pagnanakaw sa dalawang bahay sa Grand Centennial Homes Barangay Magdalo-Potol, Kawit, Cavite noong Pebrero 13, 2024.
Kinilala ni Police Brigadier General Paul Kenneth Lucas, Regional Director ng Police Regional Office 4A, ang tatlong pulis na sina PSMS John Mellona, PSMS Reynaldo Quilit Jr., parehong nakatalaga sa Provincial Intelligence Unit ng Cavite at PCpl Lynard Pareja na nakatalaga naman sa Drug Enforcement Unit ng Laguna.
Ayon kay PBGen Lucas, sapilitang pinasok ng mga suspek ang subdivision sakay ng isang puting van at saka itinali ang mga biktima at ninakaw ang mga gamit tulad ng cellphone, baril at pera.
Nang malaman sa imbestigasyon ang pagkakasangkot ng mga pulis ay agad silang pinasibak sa puwesto at itinalaga sa Regional Personnel Holding Area sa Camp Vicente Lim upang isailalim sa restrictive custody.
Ang CALABARZON PNP ay hindi palalampasin ang mga gumagawa ng katiwalian sa batas at makasisiguro ang publiko na ang mga nasasangkot sa nasabing krimen ay mahaharap sa anumang kaparusahan na ipapataw base sa ating saligang batas upang masiguro ang kapayapaan at kaayusan sa ating komunidad patungo sa Bagong Pilipinas.
Panulat ni Patrolwoman Angelica Rica Teng
