Tinatayang Php779,700 halaga ng shabu ang nasamsam ng Calamba PNP sa dalawang High Value Individual (HVI) sa Bus Stop, Suero Compound, Barangay Paciano, Calamba City, Laguna nito lamang Marso 2, 2024.
Kinilala ni Police Colonel Gauvin Mel Y Unos, Provincial Director ng Laguna Police Provincial Office, ang mga suspek na sina alyas “Khara”, 18 at “Nora”, 32, parehong residente ng Datu Ismael, Dasmariñas, Cavite.
Naaresto ang mga suspek bandang 11:18 ng gabi sa ikinasang buy-bust operation ng mga tauhan ng Calamba Component City Police Station.
Nakumpiska mula sa mga suspek ang tatlong pirasong heat-sealed transparent plastic sachet at isang pirasong Knot tied transparent plastic sachet na naglalaman ng hinihinalang shabu na tumitimbang ng higit kumulang 113 gramo na nagkakahalaga ng Php779,700, isang puti na sling bag, tatlong pirasong Php1000 bill at dalawang pirasong Php500 bill bilang boodle money.
Nahaharap ang mga suspek sa kasong paglabag sa Republic Act 9165 o Comprehensive Dangerous Drugs Act of 2002.
Bilang pagsuporta sa programa ng ating Pangulong Ferdinand Romualdez Marcos Jr sa pakikipaglaban sa problema ng ilegal na droga, ang buong kapulisan ng Laguna ay patuloy na paiigtingin ang paghuli sa mga taong nagpapalaganap ng ipinagbabawal na gamot upang mapanatili ang kaayusan at kaligtasan ng ating komunidad patungo sa Bagong Pilipinas.
Source: Laguna Police Provincial Office
Panulat ni Patrolwoman Angelica Rica S Teng
