Nakumpiska ang tinatayang Php5,280,000 milyong halaga ng marijuana sa buy-bust operation ng PNP at PDEA sa Barangay Tuao North, Bagabag, Nueva Vizcaya nito lamang ika-12 ng Pebrero 2024.
Kinilala ni Police Colonel Camlon P Nasdoman, Provincial Director ng Nueva Vizcaya Police Provincial Office, ang tatlong suspek na si alyas “Jojo”, “Berta” at “Mercy”, na pawang mga residente ng Banaue, Ifugao, Abannawag at Tabuk.
Ang matagumpay na operasyon ay bunga ng pinagsanib na pwersa ng Nueva Vizcaya Police Provincial Office, PDEA, kasama ang PNP Drug Enforcement Group Special Operations Unit 2, Regional Intelligence Unit 2, Regional Drug Enforcement Unit, Provincial Drug Enforcement Unit at Bagabag Police Station.
Unang napasakamay ng operatiba ang dalawampu’t isang bloke ng marijuana na binenta ng mga suspek sa isinagawang buy-bust operation.
Kasunod nito ay ang pagkakakumpiska ng karagdagang dalawampu’t tatlong bloke ng marijuana na umabot sa 44 na kilo ang kabuuang timbang ng mga narekober na ilegal na droga.
Bukod pa rito, nakumpiska rin sa mga suspek ang Php445,000 na boodle money, tatlong telepono at isang Nissan Escapade Van.
Ang mga suspek ay nahaharap sa kasong paglabag sa Republic Act 9165 o Comprehensive Dangerous Drugs Act of 2002.
Pinuri naman ni PBGen Christopher C Birung, Regional Director ng PRO 2 ang mga operatiba na nasa likod ng matagumpay na operasyon. Dagdag pa nito, ang pinaigting na kampanya kontra ilegal na droga ay isang paraan ng ating Pangulong PBBM upang mapanatiling maayos, mapayapa at drug-free ang ating bansa.
Source: Police Regional Office 2
Panulat ni Pat Desiree Canceran
