Nakatanggap ng tatlong yunit ng Patrol Jeep 4×2 “Toyota Hilux’ Single Cab ang Police Regional Office 12 mula kay Senator Juan Edgardo “Sonny” Angara nito lamang araw ng Linggo, Pebrero 11, 2024.
Personal na nagtungo si Mr Erwin Lozano, Political Affairs Officer, bilang kinatawan ni Senator Angara sa PRO 12 para personal na iturn-over ang nasabing patrol vehicles sa tanggapan ng Cotabato Police Provincial Office, Sarangani Police Provincial Office, at Sultan Kudarat Police Provincial Office, na ginanap sa PRO 12 Covered Court, Tambler, General Santos City.
Sa mensahe ni Senator Angara na ibinahagi ni Political Affairs Officer Lozano ay kanyang nabanggit na nakikita niya ang pangangailangan ng mga pulis at iba pang uniformed services kaya naman plano nitong bigyan ang lahat ng lalawigan sa buong Pilipinas ng bagong service vehicles.
Dagdag pa nito, simula nang maupo ang senador bilang Chairman ng Committee on Finance ay nagdagdag ito ng Php100 Milyon na pondo kada taon para sa pagbili ng mga service vehicle.
Nagpapasalamat naman si Police Brigadier General Jimili L Macaraeg, Regional Director ng PRO 12 sa karagdagang mga patrol car na ibinigay ng gobyerno para mas lalong mapalakas pa ang kanilang kampanya kontra kriminalidad at pagpapanatili ng kapayapaan sa nasabing rehiyon.
Panulat ni Patrolman Khnerwin Jay A Medelin
