Arestado ang isang High Value Individual matapos makuhanan ng nasa Php6.9 milyong halaga ng shabu sa isinagawang buy-bust operation ng mga operatiba ng Bohol Police Provincial Office (BPPO) sa Purok 1, Brgy. Looc, Panglao, Bohol nito lamang Pebrero 3, 2024.
Kinilala ni Police Colonel Lorenzo Alfeche Batuan, Provincial Director ng Bohol Police Provincial Office, ang suspek na si “‘Frediereck”, 33 anyos at residente ng Purok 3, Brgy. Bil-isan, Panglao, Bohol.
Dakong alas-9:40 ng gabi nang maaresto ang suspek ng mga operatiba ng Provincial Drug Enforcement Unit (PDEU), Provincial Intelligence Unit (PIU), Regional Intelligence Division 7 (RID7) kasama ang Philippine Drug Enforcement Agency (PDEA).
Nakumpiska mula sa suspek ang mga pakete ng hinihinalang shabu na may timbang na 1,020 gramo na nagkakahalaga ng Php6,936,000, buy-bust money, isang cellphone, timbangan at motorsiklo.
Ang suspek ay nahaharap sa kasong paglabag sa Section 5 at 11 ng RA 9165 o Comprehensive Dangerous Drugs Act of 2002.
Patuloy ang pagpapaigting ng Bohol PNP sa kanilang kampanya laban sa ilegal na droga para sa mas ligtas at mapayapang pamayanan.
Panulat ni Pat Vherlene Marie M Macalino
