Timbog ang dalawang High Value Individual matapos makuhanan ng higit sa Php1.4 milyong halaga ng shabu at isang baril sa ikinasang PNP buy-bust sa Brgy. Tabuc Suba, Jaro, Iloilo City, nito lamang ika-1 ng Pebrero 2024.
Bandang 9:53 ng gabi nang ilunsad ang operasyon ng mga operatiba mula sa City Drug Enforcement Unit ng Iloilo City Police Office kasama ang Iloilo City Police Station 3 at Regional Maritime Unit 6.
Kinilala ni Police Colonel Joeresty Coronica, City Director ng ICPO, ang mga nahuling HVI na sina alyas “Robin”, 28, residente ng Brgy. Tacas, Jaro, at si alyas “Jan Jan”, 27, may asawa at residente ng Brgy. Tabuc Suba, Jaro, Iloilo City.
Ayon kay PCol Coronica, narekober sa dalawang suspek ang 13 plastic sachets at 2 knot-tied sachets ng pinaghihinalaang shabu na tumitimbang ng 208 gramo na nagkakahalaga ng Php1,414,000.
Ayon pa kay PCol Coronica, nakumpiska rin sa nasabing buy-bust ang isang caliber .38 revolver na may kasamang bala, ginamit na buy-bust money, at ilang non-drug items.
Ang matagumpay na operasyon ng Iloilo City PNP ay isang patunay ng isang dedikado at tapat na paglilingkod upang masugpo ang ilegal na droga sa siyudad.
Panulat ni Pat Brent Marx Ngaya-an
