Umabot sa Php340,000 halaga ng shabu ang nasamsam sa tatlong suspek sa ikinasang buy-bust operation ng mga tauhan ng Makati City Police Station nito lamang Lunes, Enero 22, 2024.
Kinilala ni PBGen Mark Pespes, District Director ng Southern Police District, ang mga suspek na sina alyas “Jonas,” 20; alyas “Mark,” 25; at si alyas “Mary Grace,” 40, at isang masahista.
Ayon kay PBGen Pespes, nangyari ang operasyon matapos makatanggap ng isang tip mula sa isang concerned citizen ang kanilang himpilan, kaya agad nagsagawa ng operasyon ang mga tauhan ng Makati City – Poblacion Sub-Station, na humantong sa pagkakahuli sa tatlong suspek na sangkot sa ilegal na sugal bandang alas-2:30 ng madaling araw sa Laperal Compound sa Bernardino St., Guadalupe Viejo.
Nasamsam sa mga suspek ang mga bet money na nagkakahalaga ng Php520; tatlong Php.25 centavo coin na ginamit bilang flippers, isang knot-tied at limang heat-sealed transparent plastic sachet na naglalaman ng hinihinalang shabu na humigit-kumulang 50 gramo ang bigat at may Standard Drug Price na Php340,000.
Ang mga suspek na nasa kustodiya ng Makati CPS ay mahaharap sa mga reklamong paglabag sa Republic Act 9165 (Comprehensive Dangerous Drugs Act of 2002) at Presidential Decree 1602 (Illegal Gambling-cara y cruz).
Pinapaalalahanan ng SPD ang bawat indibidwal na tigilan ang anumang uri ng kriminalidad sa kanilang nasasakupan dahil hindi titigil ang kapulisan sa pagsupil sa anumang ilegal na aktibidad at papatawan ang sinuman ng karampatang parusa sa ilalim ng saligang batas.
Source: SPD PNP
Panulat ni PSSg Remelin M Gargantos
