Taguig City – Nakumpiska sa isinagawang buy-bust operation ng mga tauhan ng Southern Police District ang tinatayang mahigit Php401,000 halaga ng shabu sa dalawang suspek nito lamang Lunes, Enero 15, 2024.
Kinilala ni PBGen Mark Pespes, District Director ng SPD, ang mga suspek na sina alyas “Chad”, 64 taong gulang, at alyas “Marie”, 46 taong gulang.
Naganap ang operasyon sa kahabaan ng Barangay Rizal, Taguig City bandang alas-8:00 ng gabi sa pinagsanib puwersa ng District Drug Enforcement Unit, kasama ang District Intelligence Division, DMFB, Taguig City Police Station at PDEA-SDO na nagresulta sa pagkakaaresto sa dalawang drug suspect.
Kasama sa mga nakumpiska na ebidensya ang dalawang knot-tied plastic bag at dalawang heat-sealed transparent plastic sachet na naglalaman ng hinihinalang shabu na may tinatayang bigat na humigit-kumulang 59 gramo na may street value na Php401,200.
Bukod pa rito, nakumpiska rin ang isang tunay na Php1,000 kasama ang 39 pekeng Php1,000 na ginamit bilang buy-bust money, isang digital weighing scale, at isang itim na pouch bag.
Reklamo sa paglabag sa Sections 5 at 11 ng Article II ng RA 9165 ang kahaharapin laban sa mga naarestong suspek.
Dahil sa masigasig at patuloy na pagsasagawa ng mga operasyon ng SPD, ang mga barangay at lugar sa Southern Metro ay nananatili pa ring babantayan ng SPD 24 oras.
Source: SPD PIO
Panulat ni PSSg Remelin M Gargantos
