Cagayan – Nasabat ng Tuguegarao Component City Police Station ang Php476,000 halaga ng shabu sa isinagawang buy-bust operation sa Centro 6, Tuguegarao City, Cagayan sa harap ng China Bank nito lamang Enero 14, 2024.
Nagresulta ang operasyon ng pulisya sa pagkakahuli kina alyas “Girlie” at “Dindo” na tinuturing na Street Level Individual (SLI), katuwang ang Philippine Drug Enforcement Agency 2.
Naaktuhan ang dalawa matapos magbenta ng dalawang heat-sealed transparent plastic sachet na naglalaman ng mga hinihinalang shabu, na tinatayang 70 gramo ang timbang at may street value na humigit-kumulang Php476,000.
Ayon kay Police Brigadier General Christopher Birung, Regional Director ng Police Regional Office 2, “Magkaisa tayo sa ating kampanya laban sa ilegal na droga. Ang aming pangako sa layuning ito ay hindi natitinag at hindi kami magpapahinga hangga’t hindi namin nakakamit ang aming layunin ng isang lipunang walang droga.”
Mahaharap ang dalawang SLI na suspek sa kasong paglabag sa RA 9165 o Comprehensive Dangerous Drugs Act of 2002.
Patuloy na hinihikayat ng Pambansang Pulisya ang mamamayan na suportahan ang kampanya laban sa ilegal na droga para mapanatili ang katahimikan at kaayusan ng komunidad.
Source: Police Regional Office 2
Panulat ni Pat Desiree T Canceran
