Tinatayang nasa Php2,210,000 halaga ng umano’y shabu ang nakumpiska sa dalawang (2) lalaki sa inilunsad na drug buy-bust operation ng pinagsamang mga operatiba ng PNP Bicol sa Langon, Barangay Cararayan, Naga City nito lamang Enero 13, 2024.
Kinilala ni PCol Erwin Rebellon, City Director ng Naga City Police Office, ang mga suspek na isang 33-anyos na lalaki, binata, walang trabaho at naninirahan sa Deca Homes Vistansa, Barangay Pacol, Naga City at isang 36-anyos na lalaki, binata, drayber at naninirahan sa Milaor, Camarines Sur.
Ayon kay PCol Rebellon, bandang 12:52 ng madaling araw ng isinagawa ang operasyon ng pinagsanib na mga operatiba ng Regional Police Drug Enforcement Unit 5 (ODRDO-RPDEU5 Team Camarines Sur/ Naga) lead unit at Police Station 6- SDEU- NCPO sa pakikipag-ugnayan sa PDEA- Naga City Office.
Nakumpiska mula sa mga suspek ang 325 na gramo ng pinaniniwalaang shabu na may street value na Php2,210,000.
Mahaharap ang mga suspek sa kasong paglabag sa R.A. 9165 o ang Comprehensive Dangerous Drugs Act of 2002.
Ang matagumpay na operasyon ay bunga ng pinaigting na kampanya laban sa ilegal na droga para sa isang ligtas at maunlad na pamayanan.
Source: Naga City Police Office
