Bunga ng mahusay at mahigpit na intelligence operation, aabot sa higit Php20.7 milyon na halaga ng ilegal na droga ang nasabat ng kapulisan mula sa babaeng target sa buy-bust operation na inilatag sa ML Quezon St., Brgy. Casuntingan, Mandaue City, Cebu pasado ala-1:00 ng madaling araw noong Sabado, Enero 6, 2024.
Sa pinagsanib na puwersa ng mga operatiba ng Mandaue City Police Office, Regional Intelligence Unit, Regional Drug Enforcement Unit at ng Philippine Drug Enforcement Agency Central Visayas, hindi na nakawala pa sa mga awtoridad ang suspek na si ‘Marichu’, 41, ng Sitio Bangan, Brgy. Cabancalan, Mandaue City matapos makorner at mabuko sa pagkakasangkot sa ilegal na aktibidad.
Nabatid na ang suspek ay kapwa kabilang sa drugs watchlist ng PNP at PDEA sa rehiyon.
Nakumpiska sa suspek ang shabu na tumitimbang ng 3.050 kilo na nagkakahalaga ng Php20,740,000, buy-bust money, at mga drug paraphernalia.
Sa pahayag ng Police Regional Office 7, lumabas sa imbestigasyon, na ang nakalap na supply ng droga ay mga pawang nakalaan sa lungsod ng Mandaue, Lapu-lapu, Cebu City at ilang bahagi ng probinsya ng Cebu.
Hindi naman umano bababa sa 2 hanggang 3 kilo ng shabu ang nadidispose ng suspek kada linggo.
Nasa kustodiya ng pulisya ang suspek na sasampahan ng mga kaukulang paglabag sa Republic Act 9165.
Pinuri at muling inihayag naman ni PBGen Anthony A Aberin, PRO7 Regional Director, ang kahalagahan at malaking dulot ng matagumpay, mahusay at walang humpay na pagpapaigting at pagbibigay katuparan ng kampanya kontra ilegal na droga.
“This is the first major anti-drug accomplishment for 2024 and this will set as the template of the level of aggressiveness in our strategy to curb illegal drugs in Central Visayas, towards the realization of the BIDA Program of SILG Atty. Benjamin Abalos Jr and PNP’s 5- Focused Agenda,” saad pa niya.
