Tinatayang aabot sa Php204,136 na halaga ng hinihinalang shabu ang nasabat sa isinagawang anti-illegal drugs operation ng mga awtoridad sa Brgy. Zone II, Sogod, Southern Leyte nitong ika-5 ng Enero 2023.
Kinilala ni Police Major Alfred Reynald Dauz, Acting Chief of Police ng Sogod MPS, ang naaresto na si “Emil”, 49, at residente ng Sogod, Southern Leyte.
Ang buy-bust operation ay isinagawa ng mga operatiba ng Sogod Municipal Police Station (Lead Unit), kasama ang Provincial Intelligence Team Southern Leyte-RIU8, Samar PPO-Provincial Drug Enforcement Unit at PDEA 8 – Southern Leyte Provincial Office.
Nakumpiska mula sa suspek ang pitong pirasong sachet ng hinihinalang shabu na tumitimbang ng humigit kumulang 30.02 gramo na may tinatayang market value na Php204,136 at iba pang drug paraphernalia.
Mahaharap ang suspek sa paglabag sa Section 5 at 11, Articel II ng RA 9165 o Comprehensive Dangerous Drugs Act of 2002.
Hinihikayat naman ng PNP ang mga mamamayan na patuloy na suportahan ang kampanya laban sa mga ilegal na droga para maiwasang mapariwara ang buhay lalo na sa kabataan at mga krimen na dulot ng ipinagbabawal na gamot.
