Tinatayang nasa mahigit Php260,000 halaga ng ilegal na droga ang nasabat sa dalawang lalaki matapos magsagawa ng buy-bust operation ang mga operatiba ng Malabon City Police Station nito lamang Huwebes, Disyembre 21, 2023.
Kinilala ni PBGen Rizalito Gapas, District Director ng Northern Police District, ang mga suspek na sina alyas “Okeng”, 32, lalaki, single, walang trabaho, tubong Olangapo, residente ng Barangay 4, Caloocan City; at alyas “Anjoe”, 24, lalaki, binata, E-trike driver, tubong Lucena City at residente ng Barangay 4, Caloocan City.
Inaresto ng Station Drug Enforcement Unit ng Malabon CPS ang mga suspek makaraang magbenta ng ilegal na droga sa isang pulis na nagpanggap na poseur buyer, bandang 2:45 ng madaling araw sa kahabaan ng P. Concepcion Street, Brgy. Tugatog, Malabon City.
Nasamsam ng mga otoridad sa mga suspek ang isang (1) ladrilyo ng pinaghihinalaang marijuana na nakabalot sa transparent na packaging wrap at packaging tape na may kabuuang timbang na 1 kilo (1,000 gramo) na nagkakahalaga ng Php120,000; isang (1) piraso ng heat-sealed transparent plastic sachet na naglalaman ng hinihinalang shabu na may bigat na humigit kumulang 20.7 gramo na nagkakahalaga ng Php140,760; isang (1) piraso ng tunay na Php500 kasama ang labindalawang (12) piraso ng Php1,000 peke/boodle money: at isang (1) Christmas gift paper bag.
Kakaharapin ng mga suspek ang kasong paglabag sa RA 9165 o Comprehensive Dangerous Drugs Act of 2002.
Mananatiling alerto ang kapulisan ng Northern Metro upang hindi magkaroon ng pagkakataong makagawa ng ilegal na aktibidad ang mga indibidwal. Patuloy din sa pagsasagawa ng operasyon ang kapulisan kontra ilegal na droga at anumang uri ng kriminalidad sa lugar na kanilang nasasakupan.
Source: NPD PIO
Panulat ni PSSg Remelin M Gargantos
