Timbog ang isang notoryus na lalaking miyembro ng Ben Mama Gun for Hire Group sa isinagawang operasyon ng mga operatiba ng Taguig City Police Station nito lamang Huwebes, Nobyembre 30, 2023.
Kinilala ni PBGen Mark Pespes, Acting District Director ng Southern Police District, ang suspek na si alyas “Jerome”, 26 anyos.
Pinangunahan ng Intellegence Section ng Taguig CPS ang pag-aresto sa suspek dakong 7:10 ng gabi sa basketball covered court sa Banai, Purok 6, Brgy. Lower Bicutan, Taguig City matapos makatanggap ng impormasyon ang istasyon sa pamamagitan ng isang tawag sa telepono.
Nang rumisponde ang mga operatiba, nabigo si alyas “Jerome” na makapagpakita ng anumang mahalagang dokumento para sa mga nakumpiskang baril at granada.
Ang karagdagang pagsisiyasat ay nagsiwalat ng kanyang dating kaugnayan sa Ben Mama Gun for Hire Group na naglagay sa kanya sa listahan ng mga Criminal Gang.
Kasong paglabag sa Republic Act 10591 (Illegal Possession of Firearms and Ammunitions) at Republic Act 9516 (Illegal Possession of Explosive – hand grenade) ang kahaharapin ng suspek.
“Ang matagumpay na operasyong ito ay sumasalamin sa hindi natitinag na pangako ng Taguig City Police na tiyakin ang kaligtasan at seguridad ng mga residente dito,” ani PBGen Pespes.
Source: SPD PIO
Panulat ni PSSg Remelin M Gargantos
