Tinatayang aabot sa Php374,000 halaga ng hinihinalang shabu ang nasabat sa isinagawang buy-bust operation ng PNP-PDEA sa Brgy. Upper Tamugan, Marilog District, Davao City nito lamang Nobyembre 28, 2023.
Kinilala ni Police Captain Marlon Donquilab, Officer-In-Charge ng Toril Police Station, ang suspek na si alyas “Amay”, residente ng Marilog District, Davao City na tinaguriang High Value Individual.
Naaresto ang suspek matapos mahuli sa akto ng pagbebenta ng ilegal na droga sa isinagawang buy-bust operation ng pinagsamang tauhan ng Toril PNP at sa pakikipagtulungan ng PDEA XI.
Nakuha mula sa suspek ang ilang pakete ng hinihinalang shabu na may bigat na humigit kumulang na 55 gramo na may street market value na Php374,000 at marked money na ginamit sa operasyon.
Kasong paglabag sa Republic Act 9165 o Comprehensive Dangerous Drugs Act of 2002 ang isinampa sa nasabing suspek.
Pinuri naman ni Police Brigadier General Alden Delvo, Regional Director ang nasabing operasyon at nagsabing ipagpapatuloy ng Police Regional Office 11 ang laban kontra ilegal na droga at kriminalidad upang manatiling payapa ang kanilang nasasakupan.
Panulat ni Patrolman Alfred Vergara
