Timbog ang dalawang lalaki sa inilunsad na drug buy-bust operation ng pinagsamang mga operatiba ng Naga City PNP sa Zone 2, Olaño Compound, Barangay Abella, Naga City nito lamang Nobyembre 27, 2023.
Kinilala ni Police Major Rey Alvarez, Station Commander ng Police Station 1- NCPO ang mga suspek na isang 36-anyos na lalaki, binata, walang trabaho at isang 41-anyos na lalaki, binata, walang trabaho, pawang mga residente ng Barangay Abella, Naga City.
Ayon kay Police Major Alvarez, isinagawa ang operasyon bandang 6:45 ng gabi ng pinagsanib na mga operatiba ng Police Station 1 SDEU- NCPO, Naga City Intelligence Unit at Naga City Mobile Force Company sa pakikipag-ugnayan sa PDEA- Naga City Office.
Nakumpiska mula sa mga suspek ang 2.42 na gramo ng pinaniniwalaang shabu na may street value na Php16,456.
Ang nahuling mga suspek ay kasalukuyang nasa kustodiya ng Police Station 1- NCPO at mahaharap sa kasong paglabag sa RA 9165 o ang Comprehensive Dangerous Drugs Act of 2002.
Ang matagumpay na operasyon ng Naga City PNP ay bunga ng pinaigting na kampanya kontra ilegal na droga sa lungsod at sa tulong na rin at suporta ng mamamayan sa ating Pambansang Pulisya upang mapanatilihing maayos, ligtas at payapa ang komunidad.
Source: Naga City Police Office
