General Santos City – Kalaboso ang isang lalaki matapos makumpiskahan ng mga ilegal na baril at mga bala sa mismong tahanan nito sa Purok 4, New Mabuhay, Brgy. Mabuhay, General Santos City nito lamang Nobyembre 26, 2023.
Sa ulat na natanggap ni Police Brigadier General Jimili Macaraeg, Regional Director ng Police Regional Office 12, dakong 10:00 ng umaga nang sinalakay ng mga operatiba ng General Santos City Station 9, ang pamamahay ng kinilalang suspek na si alyas “Nerry” sa bisa ng search warrant.
Narekober mula kay Nerry ang mga hindi dokumentadong mga armas na kinabibilangan ng isang yunit ng Cal. 45 pistol at isang yunit ng 12-gauge shotgun, magazine at mga bala.
Mahaharap ang suspek sa kasong paglabag sa RA 10591 o Comprehensive Firearms and Ammunition Regulation Act.
Tiniyak naman ni PBGen Macaraeg na patuloy ang buong hanay ng PRO 12 sa kampanya laban sa lahat ng uri ng kriminalidad at ilegal na droga upang mapanatili ang kaayusan at kapayapaan sa rehiyon.
Panulat ni Patrolman Khnerwin Jay A Medelin
