Nasakote ng mga otoridad ang isang babaeng drug suspect sa buy-bust operation ng Valenzuela City Police Station nito lamang Miyerkules, Nobyembre 15, 2023 kung saan nakumpiska ang tinatayang Php170,000 halaga ng umano’y shabu.
Kinilala ni PBGen Rizalito Gapas, District Director ng Northern Police District, ang suspek na si alyas “Shiela” (SLI), 44, may asawa, walang trabaho, at naninirahan sa Gen T De Leon sa Valenzuela City.
Ayon kay PBGen Gapas, ang naturang operasyon ay pinangunahan ng mga operatiba ng SDEU-VCPS bandang 7:40 ng umaga sa kahabaan ng Francisco Street, Brgy. Gen T De Leon, Valenzuela City.
Nasamsam ng kapulisan sa suspek ang tatlong (3) pirasong heat-sealed transparent plastic sachet na naglalaman ng hinihinalang shabu na may kabuuang timbang na 25 gramo at may Standard Drug Price (SDP) na Php170,000; isang (1) pirasong tunay na Php500 na may kasamang walong (8) piraso ng Php1,000 na boodle money (buy bust money); at isang (1) kulay pula na pitaka.
Nahaharap si alyas “Shiela” sa kasong paglabag sa seksyon 5 at 11 sa ilalim ng Artikulo II ng RA 9165 o Comprehensive Dangerous Drugs Act of 2002.
Patuloy na paiigtingin ng kapulisan ng Northern Metro ang kanilang dedikasyon sa pagtugis sa mga ilegal na aktibidad sa kanilang nasasakupan upang masugpo ang talamak na bentahan ng ilegal na droga sa distrito.
Source:NPD PIO
Panulat ni PSSg Remelin M Gargantos
