Sultan Kudarat — Tuluyan nang sumuko ang isang 2nd Deputy Secretary/Political Officer mula sa SRC Daguma, Far South Mindanao Region (FSMR) at pito pang iba na miyembro ng Communist Terrorist Group (CTG) sa South Cotabato 2nd Provincial Mobile Force Company Headquarters, Sitio Sto. Nino, Brgy. Centrala, Surallah, South Cotabato nito lamang Nobyembre 10, 2023.
Kinilala ni Police Lieutenant Colonel Rey Egos, Force Commander ng 2nd South Cotabato PMFC, ang sumukong opsiyal ng CTG na si alyas “Yona”, 27-anyos, at residente ng Caloocan, Koronadal City, South Cotabato.
Habang ang iba pang tagasunod nito ay kinilala namang sina alyas “Dexter”, “Aya”, “Egeng”, “Bentong”, “Zalde”, “Moroy” at si alyas “Marlon”.
Ang kanilang pagbabalik-loob sa pamahalaan ay resulta ng kaliwa’t kanang operasyon ng 2nd South Cotabato Provincial Mobile Force Company kasama ang iba pang operatiba ng South Cotabato Police Provincial Office na pinamumunuan ni Police Colonel Arnold Casingal Santiago, Officer-In-Charge.
Dahil sa patuloy na hirap na dinaranas nila sa pagtatago sa bundok at malayo sa piling ng kanilang mga pamilya ang naging dahilan kung bakit sumuko ang mga CTGs sa mga awtoridad.
Samantala, agad namang nakatanggap ng panimulang tulong pangkabuhayan gaya ng sako-sakong bigas.
Patuloy naman ang panawagan ni Police Brigadier General Jimili Macaraeg, Regional Director ng Police Regional Office 12, sa mga natitira pang miyembro ng CTGs na sumuko at magsimulang muli sa tulong ng E-CLIP Program para makabangon at maging maunlad sa pagsisimula ng kanilang tahimik na buhay.
Panulat ni Patrolman Khnerwin Jay A Medelin
