Cebu City – Arestado ng pulisya ang dalawa sa mga tulisan na sangkot sa naganap na pagnanakaw sa isang sikat na Coffee Shop sa Salinas Drive, Brgy. Apas, Cebu City madaling araw ng Martes, Oktubre 31, 2023.
Sa video na kumalat sa social media ukol sa insidente, makikita sa kuha ng CCTV footage ng tindihan, ang pagtutok ng baril ng isa sa mga suspek habang nagsilbing look-out ang mga kasamahan nito.
Isang hot pursuit operation ang agad na inilatag ng mga kapulisan ng Mabolo Police Station 4, Cebu City Police Office, sa pangunguna ni Police Major Eraño Regidor, Station Commander, na nagresulta sa pagkakaaresto ng 31-anyos na suspek dakong alas-10:30 ng gabi ng kaparehong araw sa Purok 4 Brgy. Kamputhaw ng lungsod.
Samantala, boluntaryong sumuko sa himpilan ng Mandaue City Police Office ang isa sa mga suspek kasama ang kanyang ina bandang alas-9 ng umaga noong Nobyembre 1, 2023.
Inihahanda ang pagsasampa para sa kasong Robbery sa mga suspek na kasalukuyang nakakulong sa Mabolo Police Station 4 habang patuloy pa rin na pinaghahanap ng mga awtoridad ang isa pa na kanilang kasama.
Hinimok naman ni Police Colonel Ireneo Dalogdog, City Director ng Cebu City Police Office, ang publiko na i-report sa mga awtoridad ang mga nakakakilala sa suspek para sa tuluyang pagkakahuli nito at pagkakaresulba ng kaso.
