Oriental Mindoro – Tiniyak sa publiko ni Police Brigadier General Joel Doria, Regional Director ng Police Regional Office MIMAROPA ang pinaigting na security coverage ng PNP para sa paggunita ng Undas 2023 sa rehiyon.
Sinabi ni PBGen Doria na mananatiling full alert status ang lahat ng police units at personnel sa rehiyon para sa pagdaraos ng Undas sa Nobyembre 1–2, 2023.
“Nais kong tiyakin sa lahat na ang PRO MIMAROPA ay naninindigan sa pagtitiyak ng kaligtasan at seguridad ng publiko sa panahon ng Undas. Nagpatupad tayo ng mga komprehensibong hakbang upang mabigyan ng ligtas na kapaligiran ang lahat ng bumibisita sa mga sementeryo at iba pang pampublikong lugar. Ang ating mga police unit sa ground ay naroroon, mapagbantay, at handang tumulong at maglingkod sa komunidad,” ani PBGen Doria.
Hinikayat niya ang pagtutulungan ng komunidad at PNP para sa isang ligtas at magalang na paggunita sa makabuluhang panahong ito at iulat ang anumang kahina-hinalang aktibidad.
“Magtulungan tayong lahat para mapanatili ang kapayapaan at kaayusan sa makabuluhang pagdiriwang ng Undas,” dagdag pa niya.
Source: RPIO MIMAROPA
Panulat ni Patrolman Erwin Calaus
