Cebu – Tinatayang nasa higit Php7 milyong halaga ng pinaghihinalaang shabu ang nasabat ng Mandaue City PNP sa buy-bust operation na inilunsad sa San Jose 1, Brgy. Labogon, Mandaue City, Cebu, noong Lunes, Oktubre 23, 2023.
Kinilala ni Police Colonel Maribel Getigan, City Director, Mandaue City Police Office, ang naaresto na si alyas “Bensoy”, 28, tubong Purok 1, Santiago, Iligan City, Lanao del Norte na naninirahan sa Barangay Tipolo sa Mandaue City at naitala na High Value Individual.
Ayon kay Police Colonel Getigan, ang matagumpay na operasyon na pinangunahan ng mga tauhan ng Police Station 3 sa pamumuno ni Police Major Jade Campo Sumugat, Station Commander at nasabat mula sa suspek ang higit isang kilo ng droga na may Standard Drug Price na Php7,378,000.
Nabatid na ang suspek ay dati ng nakulong sa kaparehong kaso taong 2020 at nakalaya noong 2022.
Sa ngayon ang suspek ay sasampahan ng mga kasong paglabag sa Sec. 5 at 11, Art. II ng RA 9165.
“Taos-puso kong pinupuri ang mga dedikado nating mga kapulisan na bahagi ng matagumpay na operasyon na nagsisilbing patunay sa hindi natitinag na pangako ng PNP na protektahan ang komunidad mula sa masamang epekto ng ilegal na droga. Makakaasa ang mamamayan na ang Mandaue City Police Office ay magpapatuloy sa walang humpay na misyon para sa mas ligtas na Lungsod ng Mandaue”, pahayag ni Police Colonel Getigan.
