Puerto Princesa City – Arestado ang isang security guard at kasama nito matapos magbenta ng hindi lisensyadong baril sa ikinasang entrapment operation ng Puerto Princesa PNP sa Purok Honda Bay, Brgy. Sta. Lourdes, Puerto Princesa City.
Kinilala ni Police Captain Douglas Sabando, Officer-In-Charge ng Police Station 2, Puerto Princesa Police Provincial Office, ang suspek na isang security guard, 43, residente ng Purok Magsasaka, Brgy. Sta. Lourdes, PPC at kasama nitong isang pang lalaki, 36, mason carpenter, residente ng Honda Bay, Brgy. Sta. Lourdes, PPC.
Ayon kay PCpt Sabando, naaresto ang mga suspek sa ikinasang entrapment operation ng Police Station 2 matapos mapag-alamang ilegal na nagbebenta ang mga ito ng baril.
Nakuha naman sa dalawa ang kalibre 38 na revolver, brown holster, 20 pirasong live ammunition at iba pang kagamitan.
Sa ngayon ay inihahanda na ang kasong isasampa sa dalawang suspek na may kaugnayan sa RA 10591 at Violation of Omnibus Election Code o Gun Ban.
Ang PNP ay hindi titigil sa paglaban sa mga may pagkakasala sa batas at mga gumagawa ng ilegal na aktibidad upang manatiling ligtas at maayos ang komunidad.
Panulat ni Patrolman Erwin Calaus
