Talisay City – Naaresto ang isang delivery rider at ang kasama nito matapos makipagpalitan ng putok sa mga operatiba ng Talisay City PNP sa dragnet operation na isinagawa sa Ruiz Compound Sitio Sangi, Barangay Tabunok, Talisay City noong Linggo, Oktubre 8, 2023.
Rumesponde ang mga tauhan ng Talisay City Police Station na pinangunahan ni PLtCol Wayne Magbanua matapos makatanggap at makumpirma ang impormasyon mula sa isang concerned citizen tungkol sa presensya ng mga armadong personalidad sa nasabing lugar.
Nagkaroon ng palitan ng putok sa pagitan ng mga suspek makaraang makaramdam ang mga suspek sa pagdating ng mga pulis.
Kinilala ang isang suspek na isang delivery rider na si alyas “Berter” na tinamaan ng bala sa kaliwang braso na agad naming dinala sa Emergency Medical Services ng Talisay City para sa medikal na atensyon at ang kasama naman nito ay kinilalang si alyas “Christino”.
Kasabay ng pagkakadakip sa mga suspek, narekober sa pag-iingat ng mga ito ang dalawang (2) unit ng .45 caliber, tatlong (3) magazine, siyam (9) na mga bala at tatlong (3) sachet ng pinaghihinalang ng shabu.
Nakakulong na sa himpilan ng istasyon ang mga suspek habang inihahanda ang mga kaukulang kaso na isasampa sa mga ito kabilang na ang Frustrated Murder, paglabag ng COMELEC Gun Ban, Comprehensive Firearms and Ammunition Regulation Act, at Comprehensive Dangerous Drugs Act.
Kaugnay dito, muling tiniyak ni PLtCol Magbanua na patuloy na ipapatupad ng buong puwersa ng kapulisan ng Talisay City ang umiiral na batas at pinag-iingat ang lahat ng mga taong may balak mang-abuso.
