Sultan Kudarat — Sumuko ang isang tinaguriang Commanding Officer mula sa SROC, SRC Daguma, Far South Mindanao Region (FSMR) at dalawa pang iba na miyembro ng Communist Terrorist Group (CTG) sa South Cotabato 2nd Provincial Mobile Force Company Headquarters, Sitio Sto. Nino, Brgy. Centrala, Surallah, South Cotabato nito lamang Oktubre 10, 2023.
Kinilala ni Police Lieutenant Colonel Rey Egos, Force Commander ng 2nd South Cotabato PMFC, ang mga sumuko na sina alyas “Mayan”, 28, Commanding Officer, residente ng Caloocan, Koronadal City, South Cotabato; alyas “Izzy”, 31, dating company field worker ng CTG, residente ng Brgy. Lower Maculan, Lake Sebu, South Cotabato; at alyas “Ricarte”, 55, at residente naman ng Rizal Poblacion, Banga, South Cotabato.
Ang kanilang pagbabalik-loob sa pamahalaan ay resulta ng kaliwa’t kanang operasyon ng 2nd South Cotabato Provincial Mobile Force Company kasama ang South Cotabato Provincial Intelligence Unit, T’boli Municipal Police Station at Regional Intelligence Division 12.
Dahil sa panlilinlang at sa patuloy na hirap na dinaranas nila sa pagtatago sa bundok at malayo sa piling ng kanilang mga pamilya ang naging dahilan kung bakit sumuko ang tatlo sa mga awtoridad.
“Handa ang ating pamahalaan na tanggapin kayo at bigyan ng kaukulang tulong upang makapagsimulang muli ng bagong buhay,” saad ni PLtCol Egos.
Panulat ni Patrolman Khnerwin Jay A Medelin
