Cotabato – Arestado ang isang 64-anyos na lalaki sa isinagawang COMELEC Joint Checkpoint Operationg ng PNP at AFP sa Brgy. Fort Pikit, Pikit, Cotabato, nito lamang Setyembre 29, 2023.
Naaresto ang suspek na si alyas “Muhalidin”, na residente ng Kabasalan, Pikit, Cotabato sa isinagawang checkpoint ng mga tauhan ng Pikit Municipal Police Station at 90th Infantry Battalion, Philippine Army.
Batay sa ulat, bandang alas 7:15 ng umaga nang naaresto ang suspek sa checkpoint makaraang matuklasan ng otoridad na ito’y may dala-dalang Cal. 45 pistol na may kasamang magazine at pitong bala.
Bigo ang suspek na magpakita ng kaukulang dokumento ng baril dahilan para arestuhin ito.
Ang suspek ay mahaharap sa kasong paglabag sa Republic Act 10591 o Comprehensive Firearms and Ammunition Regulation Act at Omnibus Election Code.
Patuloy ang panawagan ng PNP sa publiko na ganap na makipagtulungan sa ipinatutupad na election gun ban at iwasang magdala ng mga baril at nakamamatay na armas dahil ang pulisya ay mananatiling nakatuon sa pagtiyak ng panuntunan ng batas para sa mas maayos at ligtas na Barangay and Sangguniang Kabataan Elections 2023.
Panulat ni Patrolman Khnerwin Jay A Medelin
