Negros Occidental – Matagumpay na isinagawa ang walk for peace at grand launching ng SAMBAYANAN-Negros sa pangunguna ng Philippine Army, Philippine National Police at Local Government Unit ng Kabankalan, Negros Occidental nitong Setyembre 21, 2023.
Ang nasabing programa ay may temang “Tikang para sa Paghiliusa, Kalinong kag Pag-uswag”, na dinaluhan ng iba’t ibang organisasyon sa lungsod, kasama na ang mga opisyal ng Barangay Orong, Hilamonan, at Oringao na kung saan naglakad ang mga kalahok mula city public plaza na may mga tarpaulins at placards na naglalaman ng mga mensahe para sa kapayapaan at pagkakaisa hanggang makarating sa Kabankalan Cultural and Sports Complex, Kabankalan City.
Sinundan ito ng paglulunsad ng SAMBAYANAN-Negros o ang “Sentrong Alyansa ng mga Mamamayan para sa Bayan-Negors sa pangunguna ni Mr. Winefredo “Ka Winie” Doblizo Jr., Coordinator, Sambayanan Western Visayas, kabilang ang mga dating Cadre, Rebelde at taga-suporta ng CPP-NPA-NDF, kung saan ang grupong ito ay naglalayong maging ehemplo sa pagtutulungan ng gobyerno at hikayatin ang bawat isa na huwag sumapi sa mga mapanlinlang na Komunistang Teroristang Grupo.
Dumalo sa nasabing aktibidad si Police Colonel Leo Pamitan, Provincial Director ng Negros Occidental Police Provincial Office kasama ang iba pang ahensya ng gobyerno upang ipahayag at ipadama ang pagsuporta.
Naroon din ang butihing alkalde ng Kabankalan City na si Mayor Benjie Miranda, Brigadier General Orlando Edralin, Commander ng 303rd Infantry Brigade, at Brigadier General Joey Escanilla, Commander ng 302nd Infantry Brigade ng Philippine Army, upang magbigay ng kanilang suporta sa nasabing pagtitipon.
Humigit-kumulang 600 na katao mula sa iba’t ibang ahensya ng gobyerno, lokal na pamahalaan, mga relihiyosong grupo, mga miyembro ng KKDAT, at non-government organizations ang nagkaisa at nagpahayag ng kanilang commitment para sa tunay at pangmatagalang kapayapaan sa Timog na bahagi ng Negros Occidental.
Sa Kabuuan, ang walk for peace at grand launching ng SAMBAYANAN-Negros ay nagtagumpay na nagpaabot ng isang makabuluhang mensahe para sa kapayapaan, pagkakaisa, at pag-unlad ng komunidad hindi lang sa Kabankalan City, pati na rin sa buong bansa.
