Negros Oriental – Arestado ng pinagsanib na puwersa ng mga operatiba ng Regional Special Operation Group at Bayawan City Police Station ang umano’y miyembro ng Private Armed Group (PAG) sa Brgy. Pagatban, Bayawan City, Negros Oriental, noong Linggo, Setyembre 10, 2023.
Kinilala ni Police Colonel Ronan Claraval, Acting Provincial Director ng Negros Oriental Police Provincial Office (NOPPO) ang naaresto na si alyas “Jojo”, 41, residente ng nabanggit na lugar.
Bago ang nasabing pag-aresto, isang ulat ang natanggap ng mga awtoridad sa isang concerned citizen tungkol sa umano’y armadong personalidad.
Kasabay ng pagkakaaresto sa suspek ay narekober sa pag-iingat nito ang nasa dalawang unit ng cal.45 pistol, magazine, mga bala, isang unit ng keypad cellphone, at apat na sachet ng hinihinalang shabu na may timbang na 20 gramo at may Standard Drug Price na Php136,000.
Sa pagsisiyasat ng mga awtoridad, lumalabas na ang naaresto ay isa sa mga suspek sa pagpatay kay Jhonar Barrios noong Hunyo 28, 2023 sa Barangay Malabugas ng naturang lungsod.
Inihahanda na ng kapulisan ang mga kaukulang kaso na isasampa laban sa naaresto kabilang na rito ang paglabag sa Comprehensive Firearms and Ammunition Act in relation to COMELEC Gun Ban at Comprehensive Dangerous Drugs Act.
