Cagayan – Naghatid saya ang mga kapulisan ng Cagayan Police Provincial Office sa pamamagitan ng Community Outreach Program sa Barangay Cabuluan, Alcala, Cagayan noong Setyembre 5, 2023.
Bumisita ang pangkat ng kapulisan sa pangunguna ni Police Lieutenant Colonel Osmundo Mamanao, Chief, PCADU upang kumustahin ang mga residenteng nahagupit ng mga bagyong Egay, Goring, at Hanna.
Nagpaabot ng higit-kumulang 200 pakete ng iba’ti bang buto ng gulay; 100 grocery packs na naglalaman ng mga bigas, de lata at noodles; at 100 pares ng tsinelas para sa mga dumalo.
Nagkaroon din ng feeding program, libreng gupit at BP monitoring.
Abot tenga ang ngiti na ipinakita ng mga residente sa maagang pamasko sa kanilang natanggap na hatid ng kapulisan at nagpaabot naman ng mensahe ng pasasalamat si Ginang Jovelyn Callo, Principal ng Cabuluan Elementary School.
Lubos din ang pasasalamat ni Brgy. Captain Rupo Baculi dahil napili ang kanilang lugar bilang benepisyaryo ng mga iba’t ibang serbisyo at tulong.
Samantala, ipinaabot ni PLtCol Mamanao ang mensahe ni Provincial Director Police Colonel Julio Gorospe Jr na magpapatuloy ang kanilang hanay na maghahatid ng mga tulong lalo na sa mga nasalanta ng kalamidad.
Ang Pambansang Pulisya ay laging handang ihandog ang malasakit sa kapwa at tunay na pagseserbisyo sa pamayanan upang makatulong sa mga biktima ng anumang kalamidad.
Source: Cagayan Police Provincial Office
