Huli sa halos magkasunod na drug bust operation ng kapulisan ang tatlong street level individual na suspek sa Sitio All Season, Brgy. Cogon Pardo, Cebu City noong Agosto 28, 2023.
Ang operasyon ay inilunsad ng mga operatiba ng Police Station 7, Cebu City Police Office sa pangunguna ni Police Major Jeciree S Basitao, Station Commander, dakong alas-4:55 ng hapon noong Lunes at nadakip si ‘Jopit’, 37, makaraang mapagbentahan ng droga ang pulis na nagpanggap na poseur buyer.
Sa kaparehong operasyon, dakong alas-6:30 ng hapon nang kaparehong araw, arestado ang 19 na taong gulang na kinilalang si ‘San Nicolas’ habang nasagip naman ang 15-anyos na lalaking isa sa mga suspek.
Aabot naman sa Php72,080 ang kabuuang halaga ng hinihinalang shabu ang nakumpiska sa mga suspek.
Mga kaukulang reklamo kaugnay sa ilegal na droga ang kakaharapin ng mga naaresto.
Ang matagumpay na operasyon ay bunga ng pinaigting na kampanya ng pulisya na masugpo ang ilegal na droga sa lungsod.
