Iloilo City – Nasabat ang tinatayang Php374,000 na halaga ng ilegal na droga sa dalawang High Value Individual sa ikinasang buy-bust operation ng City Drug Enforcement Unit at Iloilo Police Station 3 sa Brgy. Luna, Jaro, Iloilo City, bandang alas-9:00 ng gabi nitong ika-21 ng Agosto 2023.
Kinilala ni PLtCol Antonio Benitez Jr., Officer-In-Charge ng CDEU, ang mga drug personality na sina alyas “Toto Ken ken”, 21, residente ng Brgy. Desamparados, Jaro, Iloilo City, pansamantalang nakatira sa Brgy. Bakhaw, sa nasabing Distrito at si alyas “Regan”, 39, at residente naman ng Brgy. San Roque, Jaro, Iloilo City.
Ayon kay PLtCol Benitez Jr, narekober sa dalawa ang 55 gramo ng suspected shabu na may tinatayang halaga na Php374,000, Php18,000 na buy-bust money, isang pouch, isang android cellular phone na kulay asul, isang keypad cellular phone, at ang Php415.00 na proceeds money.
Ayon pa kay PLtCol Benitez Jr., si “Toto Ken Ken” ay nahuli noong Abril 2023 dahil sa ilegal na droga, ngunit nakapiyansa din ito at nakalabas habang si “Regan” naman ay nahuli rin sa parehong kaso noong 2016 at nakalabas sa taong 2019 dahil sa plea-bargaining agreement.
Balik ngayon sa kulungan ang dalawang suspek at sila ay nahaharap sa kasong paglabag ng RA 9165 o ang Comprehensive Dangerous Drugs Act of 2002.
Magpapatuloy ang Iloilo City PNP sa pinaigting na kampanya kontra ilegal droga upang tuluyang mawakasan ang paglaganap nito sa syudad at sinisigurong huhulihin ang mga taong nagpapasimuno ng ganitong ilegal na gawain.
